Łaciński oryginalny tekst breve

BENEDICTUS, P.P. XIV.

AD PERPETUAM REI MEMORIAM, ET AD AUGENDAM CHRISTI FIDELIUM DEVOTIONEM.

Coelestibus Ecclesiae thesauris paterna charitate intenti, sacra interdum Numismata, seu Cruces, vel Cruculas Sancti Benedicti nuncupatas, indulgentiarum muneribus condecorare voluimus; et personis, praesertim, speciali dignitate fulgentibus, facultatem illas cum thesauro indulgentiarum hujusmodi privative benedicendi et distribuendi libenter impartiti fuimus; et ut illa perpetuis futuris temporibus suum plenarium sortiatur effectum, firmiusque subsistat; potissimum cum a Nobis petitur, Apostolicae confirmationis robur libenter adjicimus, opemque et operas nostras impendimus efficaces, prout personarum locorum, et temporum qualitatibus matura consideratione pensat is, in Domino conspicimus salubriter expedire.

Exponi Nobis nuper sane fecit dilectus filius Benno Löbl, monachus Ordinis Sancti Benedicti expresse professus, ac modernus Abbas liberi et exempti, Sedique Apostolicae immediate subjecti monasterii Brzevnoviensis in Brauna, nullius, seu Pragensis dioecesis, et Wahlstadii Silesiorum modernus Praepositus, Praelatusque infulatus regni Bohemia, dictique Ordinis Visitator perpetuus in Bohemia, Moravia et Silesia: quod alias per Nos eidem exponenti, ejusque successoribus, ac omnibus et singulis Abbatibus, Prioribus, alterisque ejusdem Ordinis monachis, sacerdotibus, expetenti tamen praedicto, ejusque successoribus Visitatoribus praedictis subjectis, numismata seu medallias, vel cruces, aut cruculas Sancti Benedicti nuncupatas, privativa facultas, sub certa, inibi expressa formula benedicendi et respective distribuendi, pro consequendis indulgentiis, in illis amplissime elargitis, cum inhibitione cuicumque personae ecclesiasticae, in hujusmodi opere pio se immiscendi, decreto Congregationis Sanctae Romanae Ecclesiae Cardinalium super indulgentiis praepositae, sub die XXIII, mensis Decembris anni Domini MDCCXLI emanato, benigne concessa et elargita fuit: cujus decreti tenor est qui sequitur:

Ordinis Sancti Benedicti, per Bohemiam, Moraviam et Silesiam decretum:

Ad humillimas et enixas preces Domini Bennonis Löbl, Ordinis Sancti Benedicti, liberi et exempti Monasterii Brzevnoviensis in Brauna Abbat is, Wahlstadii Silesiorum Praepositi, regni Bohemiae Praelati infulati, atque Ordinis praedicti per Bohemiam, Moraviam et Silesiam Visitatoris perpetui: Sanctissimus Dominus noster Benedicitus PP. XIV, eidem Bennoni ejusque successoribus ac omnibus et singulis Abbatibus, Prioribus, caeterisque monachis sacerdotibus, ipsimet pro tempore existenti Visitatori perpetuo subjectis, Numismata, seu Medallias, vel Cruces aut Cruculas Sancti Benedicti nuncupatas, quarum una pars imaginem ejusdem Sancti Benedicti repraesentat, altera vero Crucem, in cujus extremo circuitu litterae seu characteres, scilicet: V. Vade. R. retro. S. Sathana. N. numquam. S. suade. M. mihi. V. vana. S. sunt. M. mala. Q. quae. L. libas. I. ipse. V. venena. B. bibas. In linea vero ejus recta, C. crux. S. sacra. S. sit. M. mihi. L. lux. In inversa autem, N. non. D. draco. S. sit. M. mihi. D. dux. ac demum in quatuor lateribus C. crux. S. Sancti. P. Patris. B. Benedicti respective significantes exprimuntur: facultatem privatam benedicendi, benigne concessit, atque indulsit, formula quae sequitur, nimirum:

Adjutorium nostrum in nomine Domini.
R. Qui fecit coelum et terram.

Exorcizo vos numismata, per Deum Patrem + omnipotentem, qui fecit coelum et terram, mare et omnia quae in eis sunt: omnis virtus adversarii, omnis exercitus diaboli, et omnis incursus, omni phantasma Sathanae eradicare et effugare ab his numismatibus, ut fiant omnibus, qui eis usuri sunt, salus mentis et corporis, in nomino Dei Patris + omnipotentis, et Jesu Christi + Filii ejus, Domini nostri, et Spiritus Sancti + Paracliti, et in charitate ejusdem Domini nostri Jesu Christi, qui venturus est judicare vivos et mortuos et saeculum per ignem.

R. Amen.

Kyrie eleison, Christe eleison, Kyrie eleison.
Pater noster, etc.
V. Et ne nos inducas in tentationem.
R. Sed libera nos a malo.
V. Salvos fac servos tuos.
R. Deus meus, sperantes in te.
V. Esto nobis, Domine, turris fortitudinis.
R. A facie inimici.
V. Deus virtutem populo suo dabit.
R. Dominus benedicet populum suum in pace.
V. Mitte eis, Domine, auxilium de sancto.
R. Et de Sion tuere eos.
V. Domine, exaudi orationem meam.
R. Et clamor meus ad te veniat.
V. Dominus vobiscum.
R. Et cum Spiritu tuo.

Oremus.
Deus omnipotens, omnium bonorum largitor, supplices te rogamus, ut per intercessionem Sancti Patris Benedicti his sacris Numismatibus litteris et characteribus a te designatis tuam benedictionem + infundas, ut omnes, qui ea gestaverint, ac bonis operibus intenti fuerint, sanitatem mentis et corporis, et gratiam sanctificationis, atque indulgentias nobis concessas consequi mereantur, omnesquo diaboli insidias et fraudes per auxilium misericordiae tuae effugere valeant, et in conspectu tuo sancti et immaculati appareant, Per Dominum, etc.

Oremus.
Domine Jesu, qui voluisti pro totius mundi redemptione de Virgine nasci, circumcidi, a Judaeis reprobari, Judae osculo tradi, vinculis alligari, spinis coronari, clavis perforari, inter latrones crucifigi, lancea vulnerari et tandem in cruce mori: per tuam sanctissimam Passionemque humiliter exoro, ut omnes diabolicas insidias et fraudes expellas ab eo, qui Nomen sanctum tuum his litteris et characteribus a te designatis devote invocaverit, it eum ad salutis portum perducere digneris, qui vivis et regnas, &c.

Benedictio Dei Patris + omnipotentis, et Filii +, et Spiritus + Sancti descendat super haec Numismata, ac ea gestantes, et maneat semper: in nomine Patris + et Filii + et Spiritus + Sancti. R. Amen.

Eadem vero Numismata sic per Visitatorem caeterosque monachos praefatos pro tempore existentes benedicta, et spiritualibus gratiis ac coelestibus Ecclesiae thesauris specialiter insignire volens: omnibus et singulis utriusque sexus Christi fidelibus, aliquod hujusmodi Numismatum, seu Crucularum, sic benedictum devote gestantibus, ac insimul pia opera, prout infra suis cuique locis respective injungitur, peragentibus, indulgentas modo et forma quae praescribitur, clementer concessit atque indulsit, videlicet: ut qui saltem semel in hebdomada Coronam Domini, vel Beatissimae Virginis Mariae, vel Rosarium, ejusve tertiam partem, aut Officium vel divinum, vel parvum ejusdem beatissimae Virginis Mariae, vel Defunctorum aut septem Psalmos poenitentiales, vel Graduales, recitare, aut rudimenta fidei edocere, aut detentos in carcere, vel alicujus domus hospitalis aegrotos visitare, aut pauperibus subvenire, aut Missam vel audire, vel, si sacerdos, celebrare consueverit; si vere poenitens, et sacerdoti per Ordinarium approbato confessus fuerit, ac sanctissimum Eucharistiae Sacramentum sumpserit, in quolibet ex diebus infra scriptis, nimirum: die festo Nativitatis Domini nostri Jesu Christi, Epiphaniae, Resurrectionis, Sanctissimae Trinitatis, et Corporis Christi, Ascensionis, Pentecostes, diebus Conceptionis, Nativitatis, Annuntiationis, Purificationis et Assumptionis Beatissimae Virginis Mariae; nec non primo die Novembris festo Omnium Sanctorum, ac die festo Sancti Benedicti: et pro haeresum ac schismatum extirpatione, fidei catholicae, exaltatione ac propagatione, pace et christianorum principum concordia caeterisque Romanae Ecclesiae necessitatibus pias ad Deum preces effuderit, plenariam omnium peccatorum suorum remissionem et indulgentiam consequatur;

Qui eadem in aliis festis Domini, aut Beatissimae Virginis Mariae sanctorumque Apostolorum, aut sancti Josephi, aut sanctorum Mauri, Placidi, Scholasticae, vel Gertrudis, Ordinis Sancti Benedicti, peregerit, in quolibet eorum septem annorum, totidemque quadragenarum indulgetiarum acquirat.

Quam pariter adipiscatur, qui Missam audiet, vel si est sacerdos, celebrabit, ac pro christianorum principum prosperitate, illorumque statuum et ditionum tranquillitate Deum orabit.

Qui ob reverentiam erga Passionem Jesu Christi Domini nostri, Feriis sextis, aut in honorem Beatissimae Virginis Mariae diebus Sabbati, jejunaverit, qualibet earum die id egerit, indulgentiam septem annorum, totidemque quadragenarum.

Qui vero confessus, ac sacra communione refectus, jejunum iisdem diebus per integrum annum, servaverit plenariam indulgentiam lucretur; qua etiam gaudeat qui idem opus complere intendens infra annum decesserit:

Qul semel vel pluries in die jaculatoriam: Benedicta sit purissima et immaculata Conceptio Beatissimae Virginis Mariae, proferre consueverit, indulgentiam quadraginta dierum inquirat.

Qui saltem semel in hebdomada Coronam, aut Rosarium, aut Officium Beatissimae Mariae Virginis, vel defunctorum, aut Vesperas cum uno saltem Nocturno et Laudibus, aut septem Psalmos poenitentiales et Litanias, earumque preces, aut in honorem Sanctissimi Nominis Jesu, vel quinque ejus plagarum, quinquies Orationem Dominicam, aut in honorem Sanctissimi Nominis Mariae quinquies Salutationem Angelicam, aut Antiphonam: Sub tuum praesidium, cum una qualibet ex approbatis Orationibus Beatissimae Virginis recitare consueverit, quo die id egerit, indulgentiam centum dierum consequatur: qua semel in quavis Feria sexta fruatur. Qui Orationem Dominicam, ac Salutationem Angelicam ter dixerit, ac de Passione et morte Domini nostri Jesu Christi pie cogitaverit; eamdem pariter lucretur, qui ob devotionem erga sanctos Josephum, Benedictum, Marum, Scholasticam ac Gertrudem, recitando Psalmum: Miserere mei Deus; aut quinquies Orationem Dominicam et Salutationem Angelicam oraverit, ut Deus per eorum intercessionem sanctam catholicam Ecclesiam conservet, ipsumque devotum beato fine quiescere faciat.

Qui in celebranda Missa vel sumenda Eucharistia, aut Officio divino, vel parvo Beatissimae Mariae Virginis persolvendo, priusquam incipiat devotam aliquam precationem adhibuerit, quinquaginta dierum indulgentia gaudeat; quam similiter asequatur, qui pro Christi fidelibus in exitu vitae constitutis Deum deprecabitur, ac pro ipsis ter Orationem Dominicam et Salutationem Angelicam dixerit.

Qui detentos in carcere, aut aegrotos in nosocomiis, eos aliquo pio opere adjuvando, visitaverit, aut doctrinam christianam in ecclesia, vel domi, filios aut propinquos aut famulos docuerit, praeter indulgentias ab aliis Summis Pontificibus ad id concessas, toties indulgentiam bis centum dierum acquirat.

Qui Coronam aut Rosarium Beatissimae Virginis in honorem ejusdem purissimae et Immaculatae Conceptionis recitaverit, ipsam deprecans apud ejus divinum Filium, ut sine lethali labe vivere et mori valeat, indulgentiam septem annorum percipiat; quam pariter qui sacratissimum Eucharistiae viaticum ad infirmos devote sociaverit, praeter indulgentias ad idem tam pium opus ab aliis Summis Pontificibus concessas, omnino consequatur.

Qui quotidie pro haeresum extirpatione oraverit, indulgentium viginti annorum semel in hebdomada lucretur.

Qui conscientiam suam excusserit, ac vere poenitens peccata commissa emendare et confiteri firmiter proposuerit, quinquies Oratione Dominica aut Salutatione Angelica devote repetita, unius anni; si vero confessus, et sacra communione refectus fuerit, eadem die decem annorum indulgentia fruatur.

Qui probo suo exemplo aut consilio aliquem peccatorem ad poenitentiam reduxerit, tertiae partis poenarum sibi propter sua peccata alias quomodolibet debitarum remissionem consequatur; qui vere poenitens confessus, sacraque communione refectus in Feria quinta Coenae Domini, et in die Paschalis Resurrectionis, pro Sanctae Matris Ecclesiae exaltatione, Summique Pontificis conservatione, pias ad Deum preces effuderit, easmet acquirat indulgentias, quas iidem diebus Sanctitas Sua populo benedicens publice elargitur.

Qui Deum pro Ordinis seu Religionis Sancti Benedicti propagatione deprecatus fuerit, particeps fit omnium et singulorum bonorum operum, quae in eadem Religione quomodolibet peraguntur.

Qui vel infirmitate corporis, vel alio legitimo impedimento detentus, Missam audire, aut si est sacerdos, celebrare, aut Officium vel divinum, vel Beatissimae Mariae Virginis, aut alia virtutis exercitia, ad praedictas indulgentias acquirendas injuncta peragere nequiverit, iisdem nihilominus gaudeat, si pro ipsis piis exercitiis recitaverit ter Orationem Dominicam et Salutationem Angelicam ac Antiphonam: Salve Regina. Atque in fine ipsius dixerit: Benedicta sit sanctissima Trinitas, et laudetur Sanctissimum Sacramentum, ac Conceptio Beatissimae Virginis Mariae sine labe concepta, dummodo tamen confessus ac sacra communione refectus fuerit, vel saltem contritus inde sua peccata confiteri firmiter proposuerit.

Qui in articulo mortis animam suam Deo pie commendans, praemissa peccatorum suorum confessione, sumptaque sanctissima Eucharistia, si potuerit: si minus, elicita cordis contritione JESU et MARIAE nomina ore, si potuerit, alioquin corde saltem invocaverit, plenarium omnium peccatorum suorum remissionem et indulgentiam consequatur.

Quilibet omnes et singulas praedictas indulgentias ac peccatorum remissiones, necnon poenitentiarum relaxationes, aut ipso pro se adipisci, aut fidelibus defunctis per modum suffragii applicare valeat.

Non obstantibus quibuscumque in contrarium facientibus, Sanctitas Sua declaravit, quod ejusmodi Numismata seu Medalliae, quae non fuerint benedictae a praefatis monchis, vel quibus ab Apostolica Sede ex speciali gratia indultum fuerit, omni penitus indulgentia careant. Item vetuit ejusmodi Medallias chartaceas, vel ex simili materia confectas, sed tantummodo ex auro, argento, aere, auricalcho, aliove solido metallo consistentes; aliter nulla prorsus gaudeant indulgentia.

In distribuendus hujusmodi Numismatibus, eorumque usu, eadem Sanctitas Sua servari jubet Decretum felicis recordationis Alexandri VII., editum sub die sexta Februarii MDCLVII. nimirum, ut Numismata, quae vulgo Medalliae nuncupantur cum praedictis indulgentiis benedicta non transeant personam illorum, quibus a monachis praedictis concedentur, aut quibus ab eis prima vice distribuentur, nec commodari aut vendi, aut precario dari valeant; alioquin careant indulgentiis jam concessis; et aliqua deperdita, altera pro ea subrogari nullo modo possi t, nisi a quibus supra benedicta fuerit; quacumque concessione, aut privilegio in contrariam non obstante.

Insuper expresse prohibet ne quis sacerdos, sive saecularis, sive cujus libet Ordinis, Congregationis, ant Instituti regularis, quavis etiam dignitate aut officio insignitus, extra praedictos monachos, id quibus a Sancta Sede ex speciali privilegio indultum fuerit, ejusmodi Numismata, seu Cruces, ut praedicitur, benedicere, aut a se benedicta fidelibus distribuere audeat, vel praesumat, sub poenis, praeter nullitatem benedictionis et indulgentiarum, per respectivos locorum Ordinarios aut fidei Inquisitores, juxta reatus qualitatem, arbitrio infligendis. Quibuscumque in contrarium facientibus non obstantibus, praesentibus perpetuis futuris temporibus valituris.

Voluitque Sanctitas Sua, quod istarum litterarum transsumptis, seu exemplis, etiam impressis, alicujus notarii publici, vel secretarii Visitatoris perpetui praedicti, pro tempore existentis, subscriptis, et sigillo personae in dignitate constitutae, aut ejusdem Bennonis, aut existentis pro tempore Visitatoris perpetui munitis eadem prorsus in judicio, et extra ubique locorum, fides adhibeatur, quae haberetur eis praesentibus, si forent exhibitae vel ostensae.

Datum Romae, die XXIII Decembris, anno MDCCXLI.
(L. S.) L. Cardinalis PICUS, Praefectus.
A.M. ERBA, Protonotarius Apostolicus, Sacrae Congregationis Secretarius.

Sed etsi, sicut eadem expositio subjungebat, de hujusmodi Decreti, dictaeque facultatis validitate haesitari non possit; attamen cum pro ejusdem majori apud omnes veneratione, et validiori illius subsistentia, dictus exponens plurimum cupiat, Decretum praedictum cum omnibus et singulis in eo contentis et expressis, per Nos et Sedem Apostolicam ut infra, perpetuo approbari et confirmari; ideo nobis humiliter supplicari fecit expressis petens, ut ei in praesentibus opportune providere de benignitate Apostolica dignaremur.

Nos igitur eumdem exponentem specialis gratiae favore prosequi volentes, necnon quibusvis excommunicationis, suspensionis et interdicti, aliisque ecclesiasticis sententiis, censuris et poenis a jure, vel ab homine, quavis occasione vel causa latis, si quibus quomodolibet innodatus existit, ad effectum praesentium tantum consequendum, earum serie absolvendum et absolutum fore censentes, hujusmodi supplicationibus inclinati, Decretum praedictum cum omnibus et singulis in eo contentis et expressis, Apostolica auctoritate, tenore praesentium perpetuo approbamus et confirmamus, illique inviolabile Apostolicae firmitatis robur adjicimus, omnesque et singulos tam juris quam facti et solemnitatum, aliosque quantumvis substantiales defectus, si qui desuper quomodolibet interveniunt, in eisdem supplemus; necnon praesentes litteras semper et perpetuo firmas, validas et efficaces esse et fore, suosque plenarios et integros effectus sortiri et obtinere; nec illos sub quibusvis similium vel dissimilium gratiarum revocationibus, suspensionibus, limitationibus, derogationibus, aut aliis contrariis dispositioni bus, per Nos et Romanos Pontifices successores nostros, pro tempore factis et faciendis, comprehendi, sed semper ab illis excipi, et quoties in illae emanabunt, toties in pristinum et validissimum statum restituas, repositas, et plenarie reintegratas; ac denuo etiam sub quacumque posteriori data per exponentem, ejusque successores praedictos quandocumque eligendos, concessas fore et esse, suosque plenarios effectus sortiri et obtinere, eumdemque exponentem propterea, et successores suos praedictos super praesentibus omnibus et singulis a quoquam quavis auctoritate fungente, quovis praetextu, colore, vel ingenio perturbari, inquietari, aut quoquo modo impediri posse, neque debere; sicque et non aliter per quoscumque Ordinarios vel delegatos quavis auctoritate fungentes, etiam causarum Palatii Apostolici Auditores, ac Sanctae Romanae Ecclesiae Cardinales, etiam de latere Legatos, dictaeque Sedis Nuncios, judicari et definiri debere, Irritum quoque et inane decernimus, si super eis a quoquam, quavis auctoritate, scienter vel ignoranter contigerit attentari; non obstantibus Constitutionibus et ordinationibus Apostolicis, dictique Ordinis etiam juramento, confirmatione Apostolica vel quavis firmitate alia roboratis statutis et consuetudini bus, privilegiis quoque indultis, litteris Apostolicis, quibusvis superioribus et personis in contrarium privilegiorum quomodolibet facientibus, concessis, confirmatis ut innovatis; quibus omnibus et singuulis, etiamsi de illis eorumque totis tenoribus special is, et specifica, expressa et individua, non autem per alias generales idem importantes, mentio seu quaevis alia expressio habenda, aut aliqua alia exquisita forma ad hoc servanda foret; eorum tenores, etiamsi de verbo ad verbum, nihil penitus omisso, et forma in illis tradita observata, inserti forent; praesentibus pro expressis habendis, illis alias in suo robore permansuris, latissime et plenissime, hae vice duntaxat derogamus, caeteris contrariis quibuscumque.

Datum Romae, apud Sanctam Mariam Majorem, sub annulo Piscatoris, die duodecima Martii MDCCXLII, pontificatus nostri anno secundo.

P. Cardinalis Prod.